Бѣ́ же во дни́ во цéркви учя́: нóщiю же исходя́ водворя́шеся въ горѣ́ нарицáемѣй Елеóнъ. И вси́ лю́дiе изъ ýтра прихождáху къ немý во цéрковь послýшати егó. Приближáшеся же прáздникъ опрѣснóкъ, глагóлемый пáсха: и искáху архiерéе и кни́жницы, кáко бы уби́ли егó: боя́хуся бо людéй. Вни́де же сатанá во Иýду нарицáемаго Искарióтъ, сýща от числá обоюнáдесяте. И шéдъ глагóла архiерéомъ и воевóдамъ, кáко егó предáстъ и́мъ. И возрáдовашася, и совѣщáша емý срéбреники дáти: и исповѣ́да, и искáше удóбна врéмене, да предáстъ егó и́мъ безъ нарóда. Прiи́де же дéнь опрѣснóковъ, въ óнъ же подобáше жрéти пáсху: и послá Петрá и Иоáнна, рéкъ: шéдша уготóвайта нáмъ пáсху, да я́мы.