Зачáло евáнгелiа Иисýса Христá, Сы́на Бóжiя, я́коже éсть пи́сано во прорóцѣхъ: сé, áзъ посылáю áнгела моегó предъ лицéмъ твои́мъ, и́же уготóвитъ пýть твóй предъ тобóю. Глáсъ вопiю́щаго въ пусты́ни: уготóвайте пýть Госпóдень, прáвы твори́те стези́ егó. Бы́сть Иоáннъ крестя́й въ пусты́ни и проповѣ́дая крещéнiе покая́нiя во отпущéнiе грѣхóвъ. И исхождáше къ немý вся́ Иудéйская странá и Иерусали́мляне: и крещáхуся вси́ во Иордáнѣ рѣцѣ́ от негó, исповѣ́дающе грѣхи́ своя́. Бѣ́ же Иоáннъ оболчéнъ власы́ велблýжди, и пóясъ усмéнъ о чреслѣ́хъ егó, и яды́й акри́ды и мéдъ ди́вiй. И проповѣ́даше, глагóля: грядéтъ крѣ́плiй менé вслѣ́дъ менé, емýже нѣ́смь достóинъ преклóнься разрѣши́ти ремéнь сапóгъ егó: áзъ ýбо крести́хъ вы́ водóю: тóй же крести́тъ вы́ Дýхомъ святы́мъ.