По благословению митрополита Екатеринбургского и Верхотурского Евгения во всех храмах и монастырях Екатеринбургской епархии в субботу, 24 мая 2026 года, будет совершен молебен святым благоверным князьям Петру и Февронии Муромским о благополучии семьи.
Молебны святым покровителям семьи пройдут в рамках Всероссийской недели семьи «7Яфест», которая начнется 24 мая и продлится до конца месяца.
Масштабное событие пройдет приурочено к Международному дню защиты детей и проводится по инициативе Русской Православной Церкви уже в третий раз.
Как неоднократно подчеркивал Святейший Патриарх Московский и всея Руси Кирилл, «благополучие семьи — этой малой Церкви — и умножение нашего народа является абсолютным императивом для выживания нашего Отечества». Предстоятель Русской Церкви отмечает, что семья — это «богоустановленный образ организации жизни людей; она особенно нуждается в сохранении, поддержке и покровительстве».
Молебное пение с акафистом святым благоверным князьям Петру и Февронии Муромским о благополучии семьи будут совершаться в храмах Екатеринбургской епархии до или после Божественной литургии. Расписание стоит уточнить накануне в храме.
Последование молебного пения святым благоверным князю Петру и княгине Февронии Муромским чудотворцам
Священник: Благословен Бог наш всегда, ныне и присно и во веки веков.
Хор: Аминь.
Чтец: Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь. Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради. Господи, помилуй. (Трижды)
Слава Отцу и Сыну и Святому Духу, и ныне и присно и во веки веков. Аминь. Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
Священник: Яко Твое есть Царство и сила и слава, Отца и Сына и Святаго Духа, ныне и присно и во веки веков.
Чтец: Аминь.
Чтец: Господи, помилуй. (12 раз)
Слава Отцу и Сыну и Святому Духу, и ныне и присно и во веки веков. Аминь. Приидите, поклонимся Цареви нашему Богу. (Поклон)
Приидите, поклонимся и припадем Христу, Цареви нашему Богу. (Поклон)
Приидите, поклонимся и припадем Самому Христу, Цареви и Богу нашему. (Поклон)
Псалом 142
Господи, услыши молитву мою, внуши моление мое во истине Твоей, услыши мя в правде Твоей. И не вниди в суд с рабом Твоим, яко не оправдится пред Тобою всяк живый. Яко погна враг душу мою, смирил есть в землю живот мой, посадил мя есть в темных, яко мертвыя века. И уны во мне дух мой, во мне смятеся сердце мое. Помянух дни древния, поучихся во всех делех Твоих, в творениих руку Твоею поучахся. Воздех к Тебе руце мои, душа моя, яко земля безводная Тебе. Скоро услыши мя, Господи, изчезе дух мой, не отврати лица Твоего от мене, и уподоблюся низходящим в ров. Слышану сотвори мне заутра милость Твою, яко на Тя уповах. Скажи ми, Господи, путь, воньже пойду, яко к Тебе взях душу мою. Изми мя от враг моих, Господи, к Тебе прибегох. Научи мя творити волю Твою, яко Ты еси Бог мой. Дух Твой Благий наставит мя на землю праву. Имене Твоего ради, Господи, живиши мя правдою Твоею, изведеши от печали душу мою. И милостию Твоею потребиши враги моя и погубиши вся стужающия души моей, яко аз раб Твой есмь. Слава, и ныне: Аллилуиа, трижды.
Диакон (или священник): Бог Господь и явися нам.
Поется на глас тропаря святым (глас 8):
Бог Господь и явися нам, благословен Грядый во имя Господне.
Стих 1: Исповедайтеся Господеви, яко Благ, яко в век милость Его. Бог Господь…
Стих 2: Обышедше обыдоша мя, и именем Господним противляхся им. Бог Господь…
Стих 3: Не умру, но жив буду и повем дела Господня. Бог Господь…
Стих 4: Камень, его же небрегоша зиждущии, сей бысть во главу угла, от Господа бысть сей и есть дивен во очесех наших. Бог Господь…
Тропарь святым благоверным Петру и Февронии, глас 8
Якоже благочестиваго корене пречестная отрасль быв, добре во благочестии пожив, блаженне Петре, тако и с супружницею твоею, премудрою Феврониею, в мире Богу угодивше и преподобных житию сподобистеся. С нимиже молитеся Господеви сохранити без вреда отечество ваше, да вас непрестанно почитаем.
Слава, глас тойже: (Тропарь повторяется)
И ныне, Богородичен, глас тойже:
Иже нас ради рождейся от Девы и распятие претерпев, Благий, испровергий смертию смерть и воскресение явлей яко Бог, не презри, яже создал еси рукою Твоею; яви человеколюбие Твое, Милостиве, приими Рождшую Тя Богородицу, молящуюся за ны, и спаси, Спасе наш, люди отчаянныя.
Чтение 50-го псалма
Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя; яко беззаконие мое аз знаю, и грех мой предо мною есть выну. Тебе Единому согреших и лукавое пред Тобою сотворих, яко да оправдишися во словесех Твоих, и победиши внегда судити Ти. Се бо, в беззакониях зачат есмь, и во гресех роди мя мати моя. Се бо, истину возлюбил еси; безвестная и тайная премудрости Твоея явил ми еси. Окропиши мя иссопом, и очищуся; омыеши мя, и паче снега убелюся. Слуху моему даси радость и веселие; возрадуются кости смиренныя. Отврати лице Твое от грех моих и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего и Духа Твоего Святаго не отыми от мене. Воздаждь ми радость спасения Твоего и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего; возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен; сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожегаемая; тогда возложат на олтарь Твой тельцы.
Канон. Глас 8
Песнь 1
Ирмос: Воду прошед, яко сушу, и египетскаго зла избежав, израильтянин вопияше: Избавителю и Богу нашему поим.
Припев: Святии благовернии Петре и Февроние, молите Бога о нас.
Песнь Твоему угоднику, на земли Тебе прославльшему, Петру принеси, Боже, даруй ми, яко да смыслодавца песными возвеличу Тя.
Припев: Святии благовернии Петре и Февроние, молите Бога о нас.
Вас, преблаженнии, отечеству вашему, яко пресветлое солнце, Христов показа, чудесы всех озаряющее, верою к вам приходящих.
Слава Отцу и Сыну и Святому Духу.
Яко от лесных небрегше и земная, яко тленная, возненавидевше, и сего ради мира отрекшеся, преподобных чести сподобистеся, с нимиже о мире молитеся.
И ныне и присно и во веки веков. Аминь.
Богородичен: Пречистая Богородице, рождшая плотию Присносущное Слово Безначальнаго Отца, Приснодево, Емуже ныне взываем: избавителю Богу нашему поим.
Песнь 3
Ирмос: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, Едине Человеколюбче.
Припев: Святии благовернии Петре и Февроние, молите Бога о нас.
Безпомощным буди помощник, блаженне Петре, и печальным милостивное утешение, да твоими молитвами избавляеми, почитаем тя.
Припев: Святии благовернии Петре и Февроние, молите Бога о нас.
Якоже иногда змий убив, конечному безвестно предал еси, тако и ныне твое отечество борющих победи, треблаженне, да тя прославляем.
Слава Отцу и Сыну и Святому Духу.
Всякия уныния, всякия печали, всякия беды, на ны нападающия от противных, тепле молитвенно твоею ко Господу премени, Петре, да благочестно тя почитаем.
И ныне и присно и во веки веков. Аминь.
Богородичен: Тебе вси стяжахом, христиане, прибежище и стену, и Тебе славословим немолчно, Безневстная.
Седален, глас 4
Благословенному и светоносному торжеству, якоже солнцу возсиявшему, Петра и Февронии, во всем мире, к нимже течемся, вернии, и непрестанно вопием сице: аще и преидосте от земли, преславнии, но нас не отлучистеся и тамо со Ангелы Троице предстоите, Юже молите спасти души наша.
Слава Отцу и Сыну и Святому Духу, и ныне и присно и во веки веков. Аминь.
Богородичен: Слово Отчее, Христа Бога нашего, от Тебе воплотившагося, познахом, Богородице Дево, Едина Чистая, Едина Благословенная. Тем непрестанно Тя, воспевающе, величаем.
Песнь 4
Ирмос: Услышах, Господи, смотрения Твоего таинство, разумех дела Твоя и прославих Твое Божество.
Припев: Святии благовернии Петре и Февроние, молите Бога о нас.
Яко ходатай и заступник отечеству твоему, яко сопротивных решитель буди, заступляя люди твоя, тебе, Петре, славящия.
Припев: Святии благовернии Петре и Февроние, молите Бога о нас.
Яко в Небесных обителех с преподобными и праведными веселяся, преблаженне Петре купно с Феврониею, не престай моля о людех твоих.
Слава Отцу и Сыну и Святому Духу.
Тебе молимся, преблаженне, сопротивных шатание низложи и недуги человеков облегчи, яко да во гласех хваления тебе величаем.
И ныне и присно и во веки веков. Аминь.
Богородичен: Очищение нашим даруй прегрешением, яко Преблаг, и умири мир Твой, Боже, молитвами Рождшия Тя.
Песнь 5
Ирмос: Вскую мя отринул еси от лица Твоего, Свете незаходимый, и покрыла мя есть чуждая тьма, окаяннаго? Но обрати мя и к свету заповедей Твоих пути мои направи, молюся.
Припев: Святии благовернии Петре и Февроние, молите Бога о нас.
Землия освятишася, приемше честная телеса ваша, Богоблаженнии Петре и Февроние, человецы же, приемлюще вами исцеление, Христа славят, искренно вас прославльшаго.
Припев: Святии благовернии Петре и Февроние, молите Бога о нас.
Аще и преидосте от земли, но к Небесным достигли есте и тамо со Ангелы Троице предстасте, Юже молите спасти любовию вас почитающих, блаженнии.
Слава Отцу и Сыну и Святому Духу.
Яко звезды пресветлыя и яко незаходимое солнце, стяжавше вас, отечество ваше хвалится, почитающе память вашу пречестную, Петре и Февроние.
И ныне и присно и во веки веков. Аминь.
Богородичен: Деву поем Тя по рождестве, Богородице, Ты бо плотию Бога Слова нам родила еси, Емуже вси сице зовем: пути наша направи, молим Ти ся.
Песнь 6
Ирмос: Очисти мя, Спасе, многа бо беззакония моя, и из глубины зол возведи, молюся, к Тебе бо возопих, и услыши мя, Боже спасения моего.
Припев: Святии благовернии Петре и Февроние, молите Бога о нас.
О пречестная двоице! О велицыи светильницы! Освятите и прославите любовию вас в песнех славящих, чудотворцы.
Припев: Святии благовернии Петре и Февроние, молите Бога о нас.
Яко пресветлая двоице и яко пречестная верста и благосочетание, ярем Господень вземше, Тому от души поработасте.
Слава Отцу и Сыну и Святому Духу.
Яко советницы добрии своему житию, едину мысль во двою телу имуще, мир чудесы просвещаете, темже и нас озарите молитвами вашими.
И ныне и присно и во веки веков. Аминь.
Богородичен: Уясняют пророческия гласи Божию Тя, Дево, Родительницу, поем же Тя и мы, видяще сбытие честных прорицаний, девству воистинну и чистоте вместилище.
Кондак, глас 8
Мира сего княжение и славу временну помышляя, сего ради благочестно в мире пожил еси, Петре, купно и с супружницею твоею премудрою Феврониею, милостынею и молитвами Богу угодивше. Темже, и по смерти неразлучно во гробе лежаще, исцеление невидимо подаваете, и ныне Христу молитеся сохранити град же и люди, иже вас славящих.
Икос
Уясни язык мой, Спасе, и умири сердце мое, разшири уста моя и исполни Духа премудрости, да имиже возглаголю и воспою сице Твоя чудотворцы: Радуйся, Петре блаженне с прехвальною Феврониею вкупе. Радуйтеся, земли Российстей заступницы и князем православным помощницы. Радуйтеся, отечеству вашему хранители и граду нашему утверждение. О пречестная двоице и благое сопряжение, Христу молитеся сохранити град и люди, иже вас славящих.
Песнь 7
Ирмос: От Иудеи дошедше, отроцы, в Вавилоне иногда верою Троическою пламень пещный попраша, поюше: отцев Боже, благословен еси.
Припев: Святии благовернии Петре и Февроние, молите Бога о нас.
В болезни к тебе прибегающих избавляй, преблаженне Петре, купно с Феврониею, Христу вопиющих: отец наших Боже, благословен еси.
Припев: Святии благовернии Петре и Февроние, молите Бога о нас.
Всем пристанище будите, преблаженнии, и небурное оттишие сущим во гресех, да и мы с вами Христу возопием: отец наших Боже, благословен еси.
Припев: Святии благовернии Петре и Февроние, молите Бога о нас.
Прибежище да ми будете в день гнева, Богоблаженнии, яко посреде хожду сетей многих, темже избавите мя от них, да возмогу воспети вас.
Слава Отцу и Сыну и Святому Духу.
Днесь преславная память Петра и Февронии, яко солнце, возсия в мире, в нюже сошедшеся, вси воспоем сице: отец наших Боже, благословен еси.
И ныне и присно и во веки веков. Аминь.
Богородичен: Капля Боготочная, от Тебе рождающаяся, мир освяти, Богородице Дево, капли мне милости источи, освящающия души и помышления земных.
Песнь 8
Ирмос: Царя Небеснаго, Егоже поют вои Ангельстии, хвалите и превозносите во вся веки.
Припев: Святии благовернии Петре и Февроние, молите Бога о нас.
Очисти и прости согрешения наша, Безгрешне, молитвами Твоих угодник Петра и Февронии, да поем Тя, Христе, во веки.
Припев: Святии благовернии Петре и Февроние, молите Бога о нас.
Иже от сердца рукою недостойною приносимое вам хваление, блаженнии, примите и мольбу сотворите о нас ко Христу Богу.
Благословим Отца и Сына и Святаго Духа, Господа.
Троичен: Певцем, Тебе поющим, Троице Пресвятая, согрешения остави, яко Преблага, молитв ради Петра и Февронии, да Тя поем во веки.
И ныне и присно и во веки веков. Аминь.
Богородичен: Божества сосуд бывши, Чистая, просвети мя в повелении Света ходити, Пречистая, от чрева Твоего возсиявшаго и просветившаго верных сердца.
Песнь 9
Ирмос: Воистинну Богородицу Тя исповедуем, спасеннии Тобою, Дево Чистая, с Безплотными лики Тя величающе.
Припев: Святии благовернии Петре и Февроние, молите Бога о нас.
От юности вашея чистую совесть имуще к Богу, сего ради, благочестно поживше, к Вышним преидосте. Молите Христа о нас, да вас любовию почитаем.
Припев: Святии благовернии Петре и Февроние, молите Бога о нас.
Яко предстояще Святей Троице с преподобными и праведными, молитеся, блаженнии, избавити nos всякаго прещения и гнева, да вас непрестанно величаем.
Слава Отцу и Сыну и Святому Духу.
Людие твои молят тя, Богоблаженне Петре, купно моли Христа с премудрою Феврониею, с неюже в мире богоугодно пожил еси, избавити нас от всяких зол.
И ныне и присно и во веки веков. Аминь.
Богородичен: O, чудесе великаго! Како вместися во утробу Твою Христос Бог, никакоже вместимый? Егоже за хвалящия Тя умоли, Дево, от бед избавити нас и от беззаконных человек всегда.
Светилен
Иже благочестно празднующим память вашу, Богоблаженнии Петре и Февроние, вкупе мирно поживше и благочестно, молите Христа грехов оставление даровати рабом вашим.
Слава Отцу и Сыну и Святому Духу, и ныне и присно и во веки веков. Аминь.
Богородичен: Пресвятая Богородице, упование наше и похвало, Тя едину ведуще, верою покланяющеся, молим: радуйся, Неискусобрачная Святая Марие, покрове и ограждение наше и Помощница сущим в бедах. Моли Христа, Сына Твоего, за рабы Твоя, на Тя бо надеемся.
Диакон: Вонмем, премудрость, вонмем.
Прокимен, глас 4: Честна пред Господем смерть преподобных Его.
Стих: Что воздам Господеви о всех, яже воздаде ми?
Диакон: Господу помолимся.
Лик: Господи, помилуй.
Священник: Яко свят еси, Боже наш, и во святых почиваеши, и Тебе славу возсылаем, Отцу и Сыну и Святому Духу, ныне и присно и во веки веков.
Лик: Аминь.
Диакон и лик: Всякое дыхание да хвалит Господа.
Диакон: И о сподобитися нам слышанию Святаго Евангелия, Господа Бога молим.
Лик: Господи, помилуй (трижды).
Диакон: Премудрость, прости, услышим Святаго Евангелия.
Священник: Мир всем.
Лик: И духови твоему.
Священник: От Матфея Святаго Евангелия чтение.
Лик: Слава Тебе, Господи, слава Тебе.
Диакон: Вонмем.
Евангелие от Матфея, зачало 10
Во время оно, по Иисусе идоша народи мнози от Галилеи и десяти град, и от Иерусалима и Иудеи, и со онаго полу Иордана. Узрев же народы, взыде на гору, и седшу Ему, приступиша к Нему ученицы Его. И отверз уста Своя, учаше их, глаголя: Блажени нищии духом, яко тех есть Царствие Небесное. Блажени плачущии, яко тии утешатся. Блажени кротции, яко тии наследят землю. Блажени алчущии и жаждущии правды, яко тии насытятся. Блажени милостивии, яко тии помиловани будут. Блажени чистии сердцем, яко тии Бога узрят. Блажени миротворцы, яко тии сынове Божии нарекутся. Блажени изгнани правды ради, яко тех есть Царствие Небесное. Блажени есте, егда поносят вам, и ижденут, и рекут всяк зол глагол на вы, лжуще, Мене ради. Радуйтеся и веселитеся, яко мзда ваша многа на небесех.
Лик: Слава Тебе, Господи, слава Тебе.
Слава: Молитвами святых благоверных князя Петра и княгини Февронии, Милостиве, очисти множество прегрешений наших.
И ныне: Молитвами Богородицы, Милостиве, очисти множество прегрешений наших.
Стих: Помилуй мя, Боже, по велицей милости Твоей и по множеству щедрот Твоих очисти беззаконие мое.
Стихира, глас 6
Приидите, вси вернии, к честным и целебоносным мощем святых Петра и Февронии притецем, яко тии скорые помощницы и молитвенницы о душах наших; тех молитвами подает Господь мир и велию милость.
Сугубая ектения
Диакон (или священник):
Помилуй нас, Боже, по велицей милости Твоей, молим Ти ся, услыши и помилуй.
Лик: Господи, помилуй (трижды).
Еще молимся о Великом Господине и отце нашем Святейшем Патриархе Кирилле, и о господине нашем Высокопреосвященнейшем митрополите Евгении, и всей во Христе братии нашей.
Лик: Господи, помилуй (трижды).
Еще молимся о Богохранимей стране нашей, властех и воинстве ея, да тихое и безмолвное житие поживем во всяком благочестии и чистоте.
Лик: Господи, помилуй (трижды).
Еще молимся о милости, жизни, мире, здравии, спасении, посещении, прощении и оставлении грехов рабов Божиих (имена рек), и всех зде предстоящих и молящихся, и о еже умножити лета живота их.
Лик: Господи, помилуй (трижды).
Еще молимся, да хранят люди Твои заповедь сию: еже Бог сочета, человек да не разлучает, и даруется домашним их церквам несокрушимая крепость и преспеяние в любви нелицемерней.
Лик: Господи, помилуй (трижды).
Еще молимся о сохранении супружества рабов Твоих в мире и единомыслии, благочестии и чистоте.
Лик: Господи, помилуй (трижды).
Еще молимся, да возвеселятся люди Твои видением сынов и дщерей, и да умножится народ наш и благословение Твое наследуется в нем в род и род.
Лик: Господи, помилуй (трижды).
Еще молимся за всю братию и за вся христианы.
Лик: Господи, помилуй (трижды).
Священник: Услыши нас, Боже, Спасителю наш, упование всех концев земли и сущих в мори далече, и милостив, милостив буди нам, Владыко, о гресех наших и помилуй ны. Милостив бо и Человеколюбец Бог еси, и Тебе славу возсылаем, Отцу и Сыну и Святому Духу, ныне и присно и во веки веков.
Лик: Аминь.
Молитва святым Петру и Февронии
О, велицыи угодницы Божии и предивнии чудотворцы, благовернии княже Петре и княгине Февроние, града Мурома предстатели, честнаго брака хранители и о всех нас усерднии ко Господу молитвенницы!
Вы во дни земнаго жития вашего образ благочестия, христианския любве и верности друг ко другу даже до гроба явили есте и тем законное и благословенное супружество прославили есте. Сего ради к вам прибегаем и молимся со усердием крепким: принесите за нас, грешных, святыя молитвы ваша ко Господу Богу, и испросите нам вся благопотребная душам и телесем нашим: веру праву, надежду благу, любовь нелицемерну, благочестие непоколебимое, в добрых делех преспеяние, наипаче же союзом брачным сочетавшимся даруйте молитвами вашими целомудрие, друг ко другу любовь в союзе мира, единомыслие душ и телес, ложе ненаветное, пребывание незазорное, семя долгоживненное, о чадех благодать, домы исполнены благостыни и в жизни вечней неувядаемый венец славы Небесныя.
Ей, чудотворцы святии! Не презрите молений наших, со умилением вам возносимых, но будите приснии заступницы наши пред Господем, и сподобите нас предстательством вашим спасение вечное получити и Царствие Небесное наследовати, да славословим неизреченное человеколюбие Отца и Сына и Святаго Духа, в Троице покланяемаго Бога, во веки веков.
Лик: Аминь.
Величие
Ублажаем вас, святии чудотворцы Петре и Февроние, и чтим святую память вашу, вы бо молите за нас Христа Бога нашего.
Диакон: Премудрость.
Священник: Пресвятая Богородице, спаси нас.
Лик: Честнейшую Херувим…
Священник: Слава Тебе, Христе Боже, Упование наше, слава Тебе.
Лик: Слава, и ныне: Господи, помилуй (трижды), благослови.
Отпуст
Священник: Воскресый из мертвых Христос, Истинный Бог наш, молитвами Пречистыя Своея Матере, святых славных и всехвальных апостолов, святых благоверных князя Петра, в иноцех Давида, и княгини Февронии, в инокинях Евфросинии, Муромских чудотворцев, и всех святых, помилует и спасет нас, яко Благ и Человеколюбец.
Лик: Аминь.
